السلام عليكم ورحمة الله وبركاته

كنت في يوم من الايام سنة 2004 وانا بلعب كرة قدم مع زملاء وفجأه احس بألم بسيط جدا جدا في منطقة الركبة وكنت اقول اكيد من الكورة وعدت الايام والالم يختفي ويرجع ثاني وكان الالم احس انه في العظم نفسه واختفى الالم مده 4 شهور وبعدها رجع الالم في منطقة الحوض في الجهة اليمنى فقط وبعدها الالم بيزداد سوء كل فترة وكنت اخد مسكنات والمسكن مفعوله يستمر يوم واحد واليوم الثاني ما يعطي اي مفعول قلت ممكن من البرد المكيف ماثر على جسمي وما استحمل وبعد ما ازداد الوضع سوء وما صرت اقدر انام من الالم قررنا نروح لدكتور عظام وقال وفحص الدكتور حركة الرجل والركبة واخد اشعة سينية وقال ان العظام مافيها شي والحركة طبيعيه راح نسويلك جلسات علاج طبيعي وان شاء الله يخف الالم واستمريت على العلاج الطبيعي لمدة اسبوعه وما كان في اي نتيجة .. رحت لاكثر من مستشفى وتقريبا عدت 6 شهور من اول ما جاني الالم وبعدها قرروا انهم يسووا لي الاشعة المغناطيسية وما افتكر ايش كان التشخيص هل هم شخصوا الحالة؟ لكن جلست اسبوعين بعدها على نفس الحال من غير اي شي وانا بصارع في الالم وطبعا الاهل لاحول ولا قوة ولا احد متوقع المشكلة ايش تشخيصها الحقيقي .. طبعا كان في نقصان في الوزن وفقدان شهية بشكل ملحوظ ..وصلت الحالة لمرحلة اني ما كنت اقدر اوقف على رجولي وامشي عليها فأضطريت اني امشي على عكاز وايامها كنت في المدرسة وكنت اروح بالعكاز .. بعدها قررنا نسافر لالمانيا على اساس ان الحالة اللي عندي مجرد مشكلة في العظام ..سبحان الله استشاروا طبيب في العائلة وسمع القصة وقال في مستشفى اورام في لندن نراسلهم ويردوا علينا ونرسل ايميل بالاعراض اللي تجيني مع كم تحليل للدم وخير ان شاء الله .. ارسلنا التقارير مافي اسبوع وطلبوا مني اجي على الفور للمستشفى وكان اسمه Royal marsedn hospital وانا طبعا كنت في المرحلة الثانوية والاصح 2 ثانوي وما كانت عندي الخلفية التامة عن السرطان.. قلت نروح المستشفى هناك وان شاء الله كلها كم اسبوع وارجع وطبعا ودعت الشباب انا رايح توصوني شي كلها كم يوم وجاي ان شاء الله .. وصلت من المطار للمستشفى وادخل المستشفى اشوف الناس كلهم حالقين شعرهم استغربت كلهم من غير شعر !!؟ قلت انا فب مستشفى جيش ولا عسكرية ؟ كنت فعلا ما ادري ايش الموضوع .. واخدوا عينتين من نخاع العظام وقالوا بعد كم يوم انت لازم تتنوم في المستشفى انت عندك سرطان " high grade B cells lymphomas" اللي تسمى بالعربي الليمفوما.. كنت انا جالس على طرف السرير والدكتور قدامي والوالد واقف جنبه بيسمع الكلام متفاجئ ومصدوم من التشخيص مو مصدق ابدا قال انت عندك سرطان ولو اتأخرت عن العلاج انت حتموت وعلاجك حيكون كيماوي حااااد جدا ولمدة 6 شهور معزول في غرفة لحالك ....
طبعا يعني تقريبا كم كان عمري 17 سنة ؟؟ واسمع الكلام اكيد ماحصدق نفسي هل انا في حلم ولا علم
وابتدأ الصراع بيني وبين السرطان والحمدلله اتغلبت عليه وشفيت منه تماما.. اسأل الله العلي العظيم ان يشفي جميع مرضانا ومرضى المسلمين

اسف طولت عليكم لكن القصة مختصرة جدا لانها تحمل الكثير من المعاناه ولكن في كل الاحوال يارب لك الحمد ويارب ان ترزقنا جميعا بالعافية والمعافاه الدائمة .. آميــن